Dapi jamnas cuora ina immensa campagna en favur dil Parc Adula. Ils promoturs leventan enormas speronzas. Quei project porti beinstonza e detti gronds impuls economics. En realitad va ei en emprema lingia ed oravontut per protecziun, per scamonds e prescripziuns e fetg pauc en favur dall’economia. Haveis Vus udiu entochen oz en quella visiun d’in sulet project da muntada economica, dad in che porta in tschuppel bunas plazzas da lavur en vischnaunca?
Quella tendenza unilaterala ei clara. Ella dariva gia dalla cumposiziun dil team, che ha duront onns ed onns preparau - per bia raps – il project. En quella equipa hai ei negin cun enconuschientschas profundas dil turissem, dalla gastronomia, dall’economia e dil mistregn. Capeivel che quels aspects essenzials ein vegni alla cuorta. Per dar empau zucher vegnan ussa caussas da pintga muntada numnadas, piculezzas che portan pauc, en mintga cass buca novas plazzas da lavur.
Dapi jamnas celebreschan las medias il project Parc Adula. Tier mintga occasiun vegnan ils promoturs menziunai sill’emprema pagina, votums critics vegnan strusch menziunai. Il pievel astga par’ei buca udir ils arguments encunter. Ei sedamonda era tgi che finanziescha quella campagna? Il votan e la votanta havessan il dretg da saver quei.
Emploiai cantunals prendan peda seras en e seras ora da serender ellas valladas, specialmein quels digl uffici per la protecziun dalla natira (il renomau ANU). Tgei enorm engaschament sin donn e cuosts dil pagataglia! Ei quei tolerabel? Pil solit cumparan quels funcziunaris mo cura ch’ei setracta da scumandar d’allontanar ina caglia ni da muentar in crap. A tals missiunaris duessan nus crer, ch’els seigien tuttenia cheu per promover nossa economia?
Ei dat era constellaziuns tut specialas, per exempel a Mustér. Martin Kreilliger sustegn p. ex. cun tutta forza quei project, iniziaus dalla Pro Natura. El ei era el cussegl d’administraziun dallas Pendicularas Mustér. Lezzas lessan urgentamein saver far indrezs da far neiv a Caischavedra. Ed ussa blochescha gest la Pro Natura la realisaziun da quei desideri (entras in recuors). Curiosa constellaziun. Ins promova quels ch’impedeschan ils agens interess.
Interessant ei era la posiziun dil cussegl da vischnaunca da Mustér. La majoritad ha decidiu da sustener il Parc Adula. La medema sera recamonda el da dar in credit da 2,5 milliuns per far neiv, pia per ina project che vegn cumbattius da glieud ord in contuorn dil Parc Adula. Ei quei buca in menaschi remarcabel.
Pablo Maissen
